फलक
.................................................. मुखपृष्ठ ( होमपेज) ........................................ आमच्याविषयी थोडेसे... ........................................ संपर्क ..................................................

फुलपाखरू

(जाति-अंजनी)


जेथें हिरवळ फार विलसते,
ललताद्रुमांची शोभा दिसते
तेथें फुलपाखरुं पहा हें –
सुंदर बागडतें !                       १

कलिकावरुनी, पुष्पांवरुनी,
गन्धयुक्त अवकाशामधुनी,
पुष्परागा सेवित हिंडे-
मोदभरे करुनी !                     २

तरल कल्पना जशी कवीची,
सुन्दर विषयांवरुनी साची
भ्रमण करी, गति तशीच वाटे-
फूलपांखराची !                      ३

वा मुग्धेची जैशी वृत्ति
पतिसहवास स्वप्नावरती
विचरे फुलपांखराची तशी
हालचालही ती !                    ४

निर्वेधपणें इकडे तिकडे
वनश्रींतुनी अहा ! बागडे;
त्याचा हेवा हृदयीं उपजुनि
मन होई वेडें!                       ५

तिमिरीं आम्हीं नित्य रखडणें,
विवंचनांतचि जिणें कंठणें,
पुष्पपंतंगस्थिति ही कोठुनि-
आम्हांला मिळणें !                ६

असे यास का चिन्ता कांही?
यास ‘उद्या’ चा विचार नाहीं,
अकालींच जो आम्हां न्याया
मृत्युमुखीं पाही !                 ७

बहु सौख्याची कुसुमित सृष्टि,
तींत वसे हें, न कधीं कष्टी,
ग्रीष्मांचें खर रुप विलोकी-
नच याची दृष्टि !                  ८

‘सर्व विनाशी असती प्राणी.’
ही मज खोटी वाटे वाणी;
फुलपांखरुं-मरण पाहिलें –
आहे का कोणीं ?                ९

(वृत्त-वसंततिलका)
जें रम्य तें बघुनियां मज वेड लागे,
गाणें मनांत मग होय सवेंचि जागें;
गातों म्हणून कवनीं फुलपांखरातें,
व्हायास सौख्य मम खिन्न अशा मनातें.    १०

- मासिक मनोरंजन
वर्ष ६, अंक ५, नोव्हेंबर १९०० पृ. १०१

केशवसुतांचा जीवनपट

फलक