फलक
.................................................. मुखपृष्ठ ( होमपेज) ........................................ आमच्याविषयी थोडेसे... ........................................ संपर्क ..................................................

फुलांची पखरण

(गाणे)

टिप् फुलें टिप् ! माझे गडेग ! टिप् फुलें टिप् !
पहा फुलांचि पखरण झिप्प! ।। ध्रु ।।
किति सुखाची सकाळ
किति मौजेची ही वेळ,
दिशा या फांकती,
फुलें ही फुलती,
पक्षी हे बोलती;
सगळ्याही सृष्टिनें पहा निद्रा ती टाकली;
प्रीती ती आशेसंगे खेळाया लागली;
तर, आनन्दें या झाडांखाली
टिप् फुलें टिप !                            १

किति सकाळ ही सुन्दर,
जसें मुलीचें माहेर,
जगाचे ते व्याप
दुरि तैसे संताप,
मनिं न शिरे मुळिं पाप;
पुण्याची ही वेळ पहा गे ! सूर्याने उजळीली,
आशेचियां ग वेलीवरती गाणीं ती फुललीं;
तर, मौजेनें या वेलींखालीं
टिप् फुलें टिप् !                            २

सकाळ जाइल संपून
मग तापेल तें ऊन;
मग धन्दे कराल,
पण, फुलें ही विसराल;
सुख कैसें पावाल ?
फिरुनी ऐशी वेळ गडे ग ! कधिंतरि ती येइल का ?
गडे !
आनन्दमधिं असा आपुला काळ कधीं जाइल का ?
म्हणुनि, असें जों बहर तोंवरी टिप् फुलें टिप् !

पहा फुलांचि पखरण झिप !
मझे गडे ग !
टिप् फुलें टिप् !                            ३

कल्याण, २० एप्रिल १८९१
करमणूक, ५ डिसेंबर १८९१, पृ. ५१

केशवसुतांचा जीवनपट

फलक