फलक
.................................................. मुखपृष्ठ ( होमपेज) ........................................ आमच्याविषयी थोडेसे... ........................................ संपर्क ..................................................

भृंग

(जाति –बालानंद)

भृंगा ! दंग अहा ! होसी,
गुंगत धांव वनीं घेसी;
तुजमागुनि वाटे यावें,
गोड फुलें चुम्बित गावें !                      १

रवि येत असे उदयातें,
अरुणतेज विलसित दिसतें;
तरी तिमिर हा विरल असे,
धुकें भरुनि न स्पष्ट दिसें.                    २

कविच्या हृदयी उज्ज्वलता
आणिक मिळती अंधुकता;
तीच स्थिती ही भासतसे –
सृष्टी कवयित्रीच दिसे !                       ३

तिच्या कल्पना या गमती
कलिका येथें ज्या फुलती;
सुगन्ध यांतुनि जो झुकतो
रस त्यांतिल तो पाझरतो!                  ४

भृंगा! आणि तुझें गान
सृष्टिचें गमतें कवन !
गा तूं ना ! गानी भ्रमरा !
मी गणमात्रा जुळणारा!                      ५

शुक पंजरबन्धीं घालूं,
त्या पढवूं नरवागू बोलूं,
श्रुतिवैचित्र्या बघणारे
आम्ही मात्रा जुळणारे !                      ६

‘कवि’ आम्हांलागुनि म्हणणे
कविशब्दार्थी लोळवणें !
अस्मद्वान नव्हे ‘गान’ –
ते गाना चिंध्यादान !                        ७

परन्तु भृंगा ! तव गान
परमानन्दें परिपूर्ण !
उदासीन ही जगाविशीं
तव तन्मयता सृष्टीशीं !                     ८

अस्मदीय हृदयीं ठरलें
कीं जग हें दु:खें भरले !
म्हणुनी सुन्दरतेलाही
कुसें अम्हां दिसती पाहीं !                   ९

परि तव गानांतून, अले,
थबथबला हा भाव गळे :-
गुङ्‌ गुङ्‌ गुङ्‌ गुङ्‌ ! भान नसे –
सृष्टि अहा गुड् ! मधुर असे !                १०

“दु:ख वदा तें केंवि असे ?
अश्रू – तें हो काय ? कसें ?
फुलें फुलति, परिमल सुटती,
रस गळती – गुङ्‌ ! सौख्य किती !”       ११

जाइ, जुई, मोगरी भली,
कमलिनीहि सुन्दर फुलली :
मधु यांचा सेवुनि गोड
पुरवीं तूं अपुलें कोड                          १२

प्रीति, चारुता, आनन्द,
यांचे गा मधुरच्छन्द;
प्रीति, चारुता, आनन्द
सिंचिति सृष्टीचा कन्द !                     १३

वरुनि नभांतुनि चंडोल
ओतीतसे हेचि बोल;
खालीं तव गुंजारव हा
प्रतिपादितसे तेंचि अहा !                  १४

(वृत्त-वसंततिलका)
होईल का रसिकता तव लब्ध मातें ?
गुंगी मिळेल मजला तव केधवां तें ?
येतें मनांत तुझियासम भृंग व्हावे,
वेलींमधूनि कलिकांवरुनी झुकावें !       १५

खेड, १९ नोव्हेंबर १८९०
करमणूक २९ नोव्हेंबर १८९०, पृ. ४३-४४

केशवसुतांचा जीवनपट

फलक