फलक
.................................................. मुखपृष्ठ ( होमपेज) ........................................ आमच्याविषयी थोडेसे... ........................................ संपर्क ..................................................

‘कोणीकडून? कोणीकडे?’

(जाति –कालचक्र)

कोणीकडून?- कोणीकडे ?
इकडुनि तिकडे, म्हणती गडे;
येथुनि तेथें, मागुनि पुढें,
हें तर नित्यच कानीं पडे;
पण समाधान का कधीं तयानें घडे ?
जिवलगे !                                               १

कोणीकडे ग?- कोणीकडून ?
तिमिरामधेंच तिमिरामधून;
घडीभर पडे मध्येंच ऊन
अभ्रीं तेही जातें उडून;
हृदय हें उले त्यामुळें निराशा जडून !
जिवलगे !                                             २

भोगांची अवशिष्टें तुसें
घशांत खुपती, लागे पिसें;
मागें पुढे न कांही दिसे;
संशयडोहीं नौका फसे;
मग वदे-हरे राम! रे, करावें कसें ?
जिवलगे !                                            ३

गोत्यांत अशा आलों कुठून?
कोठें जाइन कैसा सुटून ?-
असें विचारी जेव्हां झटून,
भ्रणबुदबुद जातो फुटून;
मग अहा ! विभिन्नच दिसे द्दष्टि पालटून !
जिवलगे !                                          ४

शून्य म्हणूं जें मागें पुढें,
त्यांतुनि दीप्ती दृष्टि पडे,
मधला उजेड तिमिरीं दडें,
निजधामाहुनि आलों, गडे,
तर, ऋणें फेड, चल सुखें स्वाधामाकडे !
जिवलगें !                                       ५

- भडगाव, १७ ऑक्टोबर, १९००
मासिक मनोरंजन, वर्ष ७, अंक ७,
जानेवारी १९०२, पृ. १४९
काव्यरत्नावली, वर्ष १४, अंक ३

केशवसुतांचा जीवनपट

फलक